ŞAH BAZarı və OLİMPİa oyunları

Dekabrın 15-dən 21-dək Bakı İdman Sarayında əsas təşkilatçısı "Qanun" Nəşrlər Evi olan "Yeni İl Milli Kitab Sərgisi" adlı çox möhtəşəm bir tədbir keçirildi. Əslində bu həqiqətən də sadəcə kitab sərgisi yox, kitab bayramı idi. Əl işləri və sair fərdi yaradıcılıq məhsullarını da diqqətdən kənarda qoymayan sərgidə paytaxtdan və bölgələrdən nəşriyyatlar, kitab evləri, satiş şəbəkələri, digər təsisatlarla yanaşı yazıçılar da ayrıca iştirak edirdi. Onu da deyim ki, yazşıçılara yerhaqqı tələb olunmadan masa ayrılmışdı və hər kəsə öz əsərlərini rahatca nümayiş etdirmək, kitab satmaq imkanı yaradılmışdı.
Mən ilk dəfə sərgiyə iştirakçı qismində qatılmışdım (3 kitabla) və kitablarımın satışı ilə məşğul olan ayrıca adamlar var idi deyə adətən tribunada əyləşib, yuxarıdan möhtəşəm kitab bayramını seyr edirdim.

YUXARDIN GÖRDÜKLƏRİM BARƏDƏ DÜŞÜNCƏLƏR

Əvvəla onu deyim ki, bu böyük kitab yarmarkasını bir maraqlı mənzərə, ekzotik peyzaj da adlandırmaq olardı. İlk dəfə idi ki, mən hansısa qurulmuş, proqramla düzənlənmiş tədbiri (həm də qapalı məkanda) gözəl təbiət mənzərəsinə bənzədirdim. Təəssürat o qədər xoş idi yəni. Müşahidə etdikcə də düşünürdüm ki, əslində belə möhtəşəm, zəngin bir kitab bayramını imkan etibarı ilə nəhəng dövlət strukturları təşkil edə bilərlər, nəinki, hansısa özəl qurum, üstəlik də kitab industriyasına aid müəssisə. Hər halda "Qanun" Nəşriyyatı- Şahbaz Xuduoğlu öz komandası ilə bunu bacarmışdı. Onu da deyim ki, bir var, hansısa nəşriyyatın (müəssisənin) fəaliyyətini kitab-kitab müşahidə edəsən, bir də var, sərgi-sərgi görəsən. Xeyli fərqli təəssüratlardır və ikinci hal, fəaliyyəti bütün əzəməti ilə ortaya qoyur.
Sevindim ki, artıq bizim də ölkədə nəşriyyatlar kəfəni yırtıb daha möhtəşəm tədbirlərə imza atmağa başlayıblar. Buna görə "Qaun" Nəşriyyatına ayrıca təşəkkür düşür.
Əslində mən tədbirin sonunda çıxış edib bu barədə fikrimi qismən ifadə etdim. Ancaq düşünürəm ki, nəşriyyat sərgi təşkil edirsə, yazıçı da ehtiram, təşəkkür, sayğı əlaməti olaraq həmin iş barədə fikirlərini ən azı sosial şəbəkədə ifadə etməlidir.
Əlbəttə ki, Milli Kitab Sərgisinin digər təşkilatçıları olan Azərbaycan Yazıçılar Birliyinin, Mədəniyyət Nazirliyi yanında İctimai Şuranın, “Əli və Nino” mağazalar şəbəkəsinin və digərlərinin də əməyini qiymətləndirmək, onlara da təşəkkür etmək vacibdir və edirəm də. Ancaq sözügedən simfoniyanın bəstəkarı və dirijoru "Qanun" Nəşrlər Evi idi və bunu ayrıca qeyd etməmək günah olardı.
O baxımdan Şahbaz Xudoğluya, komandasına və əlbəttə ki, tədbirin aparıcısı, Azərbaycanın xalq artisti Vidadi Həsənova ayrıca təşəkkür edirəm. Var olun, dostlar!

HAŞİYƏ

Açılış mərasimində və bir həftəlik gedişatda sərgiyə ölkənin tanınmış mədəniyyət adamları - korifey sənətkarımız Flora Kərimova, xalq şairi Sabir Rüstəmxanlı, xalq yazıçısı Çingiz Abdullayev, digər tanınmış şairlər, yazıçılar, müğənnilər, siyasi partiya rəhbərləri, deputatlar qatıldılar, ürək sözlərini dedilər. Bağlanış da başlanğıç kimi gözəl, rəngarən oldu.
Ümumilikdə isə, sərgi zamanı kitab satışları ilə eyni vaxtda, səhnədə çıxışlar, ifalar, ayrı-ayrı otaqlarda kitab, film təqdimatları, poeziya yığıncaqları, müzakirələr aparılır, Azərbaycandan və Türkəyədən olan yazarlarla görüşlər keçirilirdi.

SƏRGİDƏN ETÜDLƏR

Mümkün qədər çalışdım ki, yazıçılar kitabımı almasınlar. Bəziləri qaydanı pozsalar da, ümumilikdə bu məqsədə nail olundu. Hesab elədim ki, yeni il qabağı yazıçılar öz kitablarını satıb, əldə etdikləri gəliri bir-birinin kitabına verib, evə yenə də əldə kitab qayıtmasalar, daha münasib olar.
Elm, mədəniyyət adamlarına, yazarlara, jurnalistklərə, qazilərə, tələbələrə, müəllimlərə və b. ümumilkdə 40-dan çox kitab hədiyyə elədik. Bu da mənimçün çox önəmli məsələ idi.
Əvvəldən düşünmüşdüm ki, kimin adı “Sara” olasa, "Sara" romanımı ona hədiyyə edəcəm. Bircə Sara tapdım o boyda sərgidə, onu da təsadüfən, o da (nə gözəl ki) tələbə idi. Ən xoş duyğulardan biri də o gənc qızımıza kitab hədiyyə etməyim oldu. Mən onun Sara olduğunu biləndə necə sevinmişdimsə, o da mənim müəllif olduğumu biləndə elə sevindi...
Sərgi bizi eyni vaxtda həmkarlarımızın çoxu ilə bir araya gətirdi, görüşdürdü. Sərgi bizə köhnə və yeni oxucularla - gözəl insanlarla görüşmək, ünsiyyətdə olmaq imkanı yaratdı. İllərlə görmədiyimiz dostlar-tanışlar, qoqonum-qonşu ilə rastlaşdıq bu sərgidə. Çoxdan virtual tanış olduğumuz adamlarla ilk dəfə real görüşmək də ayrı bir söhbətin mövzusudur...
Sərgidən əvvəl FB də elan eləmişdim ki, qazilərə kitab hədiyyələri olacaq. Cəmi iki qazi yaxınlaşdı masamıza. Hərəsinə üç kitab bağışladıq və mən bütün sərgi iştirakçılarının, cəmiyyətimizin, xalqımızın adından onlara bizi belə məğrur yaşatdıqları üçün təşəkkür etdim. Birlikdə bütün şəhidlərə Allahdan rəhmət dilədik...

SON

Hə, yuxarıdan baxanda bir də onu düşünürdüm ki, aşağıda alver gedir. Yəni alış-veriş. Satılan da, qidadır. Amma mənəvi qida. Əgər buranı bazar hesab eləsək, demək ki, ŞAH BAZarıdır. Yəni, mənəviyyat şahlarının, sultanlarının bazarı. Dünyanın ən faydalı, ləziz təamının, su qədər önəmli və əbədi qidasının - kitabın bazarı.
Məncə kitab bazarı dünyada yegəna bazardır ki, satıcısı da şahdır, alıcısı da. Elə ona görə də bu bazarda satıcılarla alıcılar arasında qiymət çəkişməsi, “gedim başqa yerlərə də baxım, ucuz tapmasam, gəlib alaram” kimi ifadələr işlənmir...

SÖZ ARDI

Satışdan söz düşmüşkən, sərgidəki qazancımız kitabımın növbəti tirajını sifariş vermək üçün bəs elədi, hələ əlavə pul da qaldı. Ancaq bu olmasaydı da, belə bir kitab bayramında iştirak etmək gözlədir. Lap Olimpia oyunları haqda deyildiyi kimi: Əsas medal almaq yox, iştirak etməkdi. Bu baxımdan "Qanun" Nəşrlər Evinin "Yeni İl Milli Kitab Sərgisi"ni “Milli Kitab Olimpi” də hesab etmək olar...