Alban abidələri ilə bağlı kitabın müzakirəsi keçirildi

İyunun 7-də “Qanun” Nəşrlər Evinin akt zalında “Ermənilər alban mədəniyyətinə qarşı” kitabının müzakirəsi keçirilib.

Tədbiri giriş sözü ilə layihənin rəhbəri, yazıçı-filoloq Fazil Güney açıb və ilk sözü kitabın müəllifi, tarixçi Faiq İsmayılova verib. Faiq müəllim işğaldan azad edilmiş ərazilərimizdə bərpa olunan tarixi abidələrimizdən söz açaraq, erməni vandalizminin bu qiymətli irsə vurduğu zərbədən danışıb. Eyni zamanda, müəllifi olduğu kitabın ən vacib keyfiyyətlərini və əhəmiyyətini qısa da olsa diqqətə çatdırıb.

Daha sonra millət vəkili Ceyhun Məmmədov, Türkiyənin Azərbaycandakı səfirliyinin müşaviri Hüseyn Altınalan, şərqşünas-alim, professor Tofiq Məlikli, keçmiş səfir, filologiya üzrə fəlsəfə doktoru Tofiq Abdullayev və başqaları çıxış edərək “Ermənilər alban mədəniyyətinə qarşı” kitabının dəyərindən, erməni şovinistlərinin tarixi abidələrlə bağlı apardığı məkrli siyasətdən və onların apardığı yalançı təbliğatla mübarizənin daha da genişləndirilməsi zərurətindən danışıblar.

Rus dilində nəfis şəkildə çap edilən kitab tədbir iştirakçılarına hədiyyə edilib.

Xatırladaq ki, “Ermənilər alban mədəniyyətinə qarşı” (“Aрмянство против албанской культуры”) kitabı Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə “Qanun” Nəşrlər Evində çap olunub.