Şahbaz Xuduoğludan növbəti sərgilərlə bağlı- TƏKLİFLƏR

Şahbaz Xuduoğludan növbəti sərgilərlə bağlı

"QANUN" nəşriyyatının rəhbəri Şahbaz Xuduoğlu sərgidən razı qaldığını, amma gələn sərgi üçün bir neçə təklifi olduğunu bildirib: "VI Kitab Sərgi-Yarmarkası necə başladı, necə bitdi, heç bilmədim. Köhnə dostları gördüm, xeyli sayda yeni oxucularla tanış oldum. Ciddi şəkildə işlədik, yorulmadıq. Yerimiz darısqal olsa da, hər kəsə böyük şövqlə, ürəklə xidmət etdik. Hər kəsin əlini sıxa bilmədim, amma hər kəsin sevincli baxışlarına qarşılıq verdim - onlar işıq mənbəyidir.
Bazar gününə rəng qatıb yarmarkamıza gələn hər kəsin qarşısında özümü borclu sayıram: gənclər, uşaqlar, böyüklər, sizdən ruh almamaq mümkün deyil. Hər birinizin gəlişinə saatlarla ayaqda qalıb kitablar haqqında danışmaq bir dua kimidir. Oxuyan millətin gələcəyi parlaqdır. Sizə yüksək əhval-ruhiyyədə xidmət edən “QANUN”-un komandasına min dəfə təşəkkür edirəm. Və sonda gələcək yarmarkalarla bağlı öz təkliflərimi yazıram:
1. Kitab yarmarkaları daha geniş yerdə, məsələn, Bakı EXPO mərkəzində təşkil olunmalıdır.
2. Kitab yarmarkaları yalnız beynəlxalq səviyyəli deyil, regionlarda da keçirilməlidir; Naxçıvan və Gəncə, Sümqayıt, Lənkəran kimi böyük şəhərlərdə.
3. Təhsil müəssisələrinin iştirakı təşkil olunmalıdır.
4. Yarmarkalar 3 gün yox, 1 həftə keçirilməlidir. Bütün ölkələrdə yarmarkalar bir həftə və daha çox olur.
5. Yarmarkalara işləyən marşrutlar yarmarkaya gələnləri pulsuz daşımalıdır".