Kitab sərgisində ən çox hansı müəlliflərin kitabı satıldı – Rəşad Məcid necə lider olub?

Kitab sərgisində ən çox hansı müəlliflərin kitabı satıldı


Sentyabrın 27-29-da Bakıda VI Beynəlxalq Kitab Sərgi- Yarmarkası keçirildi. Mədəniyyət nazirliyinin təşkilatçılığı ilə keçirilən sərgidə 81 yerli və 22 ölkədən 40 xarici nəşriyyat, poliqrafiya müəssisəsi, kitab evləri və s. qurumlar öz nəşrlərini təqdim etdi, kitablarının satışını həyata keçirdi. Həmçinin, sərgi çərçivəsində tanınmış şair-yazıçıların, elm adamlarının iştirakı ilə çoxsaylı kitab təqdimatları, imza günləri və s. tədbirlər təşkil olundu.
Yarmarkada ən çox kitabı satılan müəllif isə “525-ci qəzet”in baş redaktoru, ABY-nin katibi Rəşad Məcid olub. Bu barədə məlumatı “Qanun” nəşriyyatının rəhbəri Şahbaz Xuduoğlu məlumat yayıb. O, sosial şəbəkədə paylaşdığı qeydində bildirib:
“Kitab yarmarkasında ən çox kitabı satılan Rəşad Məcid oldu.Rəşad Məcidə ayrıca təşəkkür edirəm. Yarmarka boyu orda oldu, bütün yazıçılara dəstək verdi, kitablarını aldı, gəlib-gedənlərə təqdim etdi. Bayram havasını hər kəsə çatdırmağa çalışırdı”.
Şahbaz Xuduoğlu budəfəki yarmarkada kitabları satılan müəlliflərin adlarını bu cür sıralayıb:
1.Rəşad Məcid
2.Vilayət Quliyev
3.Şərif Ağayar
4.İsi Məlikzadə
5.Pərviz Cəbrayıl
6.Niyazi Mehdi
7.İlham Kərimli
8.Əli Əmirli
9.Hikmət Hacızadə
10.Ayğül Ağayeva
11.Nəriman Əbdülrəhmanlı.
Maraqlıdır, kitabı sata bilmək, yaxşı tiraj toplamaq geniş əlaqələr ilə, yoxsa oxucu zövqü ilə bağlıdır? Müəllif hansı halda daha çox oxucu əldə edə bilir?
Yarmarkada ən çox kitabı satılan müəllif Rəşad Məcid mövzu ilə bağlı “Yeni Müsavat”a danışıb. Müəllif ilk öncə ən çox satılan kitabından söz açıb:“Bu, mənim “Qələmsiz yazılanlar” kitabımdır. Kitabım ilə bağlı sosial şəbəkədə bir ilə yaxındır ki, yazır, deyir, təbliğ edirəm. Azərbaycanda ilk dəfə olaraq bu cür kitab dərc edilib. Kitabda sosial şəbəkədə, o cümlədən facebookda olan statuslar, sms-lərlə bağlı yazılardır. Vaxtaşırı kitabın çıxacağı, onun ətrafında müəyyən ajiotaj yaranacağı barədə müəyyən piar aparmışdım. Kitaba İsa Həbibbəyli ön söz yazaraq bildirib ki, “Ədəbiyyatşünaslıqda sosial şəbəkə ədəbiyyatı yeni janrdır”.
R.Məcid yarmarkada nə qədər kitabının satılıdığını, hansı qonorarı əldə etdiyini açıqlayıb:“Düzü burada qazanc söhbəti olmayıb. Mən bunu “Qanun”nəşriyyatına dəstək kimi etdim, buna görə oradan şəxsi qonorar güdmədim.
Yarmarkanın birinci günü təxminən 200-ə yaxın kitabım satıldı. “Qanun” kimi bir neçə nəşriyyat evləri olsa müəlliflərə qonorar verə bilərlər. Tutaq ki, “Qanun” bir yazıçının kitabını çap edib, ona 500 manat qonorar verirsə, “Teas-Press” daha imkanlı olduğundan1000 manat qonorar verir, kitabı alıb özü çap edir. Əgər rəqabət şəraiti yaransa dəyərli müəlliflərin də qonorar həcmi artar və yaxşı qonorar ala bilərlər.
Bu baxımdan bu ideyanı dəstəkləmək üçün “Qanun” nəşriyyatına və kitab təbliğatına bu cür çox yüksək əmək sərf etdim. Sanıram ki, bu həmişə davamlı olmalıdır.
30 il öncə Türkiyədə kitablar 300-500 tirajla çap olunurdu. Lakin nəşriyyatların inkişafı sayəsində indi Türkiyədə 100 min tirajla kitabı çıxan müəlliflər var və onlar böyük qonorarlar alırlar.
Sovet dövründə bütün bölgələrdə kitab mağazaları var idi. Lakin sonra infrastruktur söküldü, dağıldı, bölgələrdi kitab mağazaları özəlləşdirildi.
Son 10 ildə artıq Bakıda kitab mağazaları artmağa başlayıb. Arzu edirik ki, bölgələrdə də bu olsun, bu çox vacibdir. Elə bölgələrimiz var ki, insanlar kitab oxumağa acdır, amma kitab tapa bilmir”.
Rəşad Məcid ən çox kitab satmağın sirlərindən də bəhs edib:“Şahbaz Xuduoğlu ilə danışmışdıq ki, ilk imza günüm açılış mərasimində olsun. Beləliklə həm sosial şəbəkədə, mətbuatda apardığım piarın, həm açılış mərasimində imza günümün olması nəticəsində məni tanıyanlar gəldilər, yaxınlaşdılar, nəticədə daha çox kitab alındı. Həmçinin kitabı gözləyənlər də çox idi.
Birinci gün “Qələmsiz yazılanlar” kitabımın demək olar ki, hamısı satıldı, qurtardı. Buna görə yenidən mətbəəyə gedib, kitab gətirmişdilər.
Mənə elə əvvəldən düşünmüşdüm və bilənlər də qeyd edirdi ki, “Qələmsiz yazılanlar” yeni janrdır və bu tip kitablara maraq olacaq. İnsanların bəzən qalın romanlar oxumağa hövsələsi çatmır. Ona görə də müasir dövrün ədəbiyyatı bir qədər kəsik-kəsik , xırda hekayələr, hadisələrəironiyalı, sarkazim münasibətlərdən ibarət olur. Yəni bu sosial şəbəkə statusları adlandırdığımədəbiyyatın bir janrına çevrilib, bu çox dinamikdir.
İkinci bir tərəfdən, kitabda oxucuları qıcıqlandıran məqamlar var idi. Burada bir nəfərə yazılan statuslar bəlkə bir sevgi romanın parçalarıdır, bəlkə də nə vaxtsa roman ola biləcəkdi, amma mən onları parça-parça yazıb, sms-lərlə onu bir adama göndərmişəm və onları da çap etmişəm. Yazılarda giley də, sevgidən xoşbəxt olmaq da, əzab, iztirab da var. Görünür ki, bu da oxucular üçün maraqlı olub. Düşünürəm ki, bu maraq davam edəcək və bu kitabı hələ çox adam axtaracaq.
Ümumiyyətlə bizim yazıçıların böyük əksəriyyətində öz kitabını reklam etmək xarakteri yoxdur. Yazıçı sakit təbiəti ilə oturub kitabını yazır, amma onun reklamını aparmağa həvəs göstərmir. Məsələn, yarmarkada Pərviz Cəbrayıl və Nəriman Əbdülrəhmanlıimza günləri keçirdilər. Onlar çox sakit, iddiasızoturmuşdular. Amma mən hər zaman yazıçılarla bir yerə toplaşanda deyirəm ki, dəyərli bir əsər yazmısınızsa mütləq onun reklamı ilə məşğul olmalı, hansısa şəkildə diqqəti cəlb etməlisiniz”.
R.Məcid qeyd etdi ki, son vaxtlar kitab oxuyanların sayı artıb:“Yeni imzalar üçün isə mütləq lazımdır ki, hansısa formada özünü tanıtdırsın, piar aparsın.Hətta tərəfdarıyam ki, kitabların təqdimatını keçirməkdənsə müəllif özü gəlib otursun, oxuculara üz tutsun və özü oxucuları qıcıqlandırsın ki, niyə onun kitabını almalıdırlar və sairə. Təəssüf ki, bu bacarıq çox yazıçılarımızda yoxdur”.