Ədəbiyyat üzrə Nobel mükafatının qalibləri seçildi- Olqa Tokarçuk və Piter Handke

 Ədəbiyyat üzrə Nobel mükafatının qalibləri seçildi

Bu gün 2018-2019-cu il Ədəbiyyat üzrə Nobel mükafatının qalibləri açıqlanıb. Ədəbiyyat üzrə Nobel mükafatının 2018-ci il qalibi polşalı Olqa Tokarçuk və 2019-cu il qalibi Avstriya yazıçısı Piter Handke olub.

Polşa yazıçısı və şairə Olqa Tokarçuk 1962-ci ildə anadan olub. 2018-ci ildə Buker mükafatı qazanıb. Varşavada psixologiya fakültəsini bitirib. İlk romanı 1993-cü ildə çap etdirdiyi “İnsanların kitaba yolu” uğur qazanıb. “Qaçaqlar” romanı isə ona şöhrət gətirib.
Avstriya dramaturqu və yazıçısı Piter Handke 1942-ci ildə anadan olub. Məşhur rejissor Vim Venderslə əməkdaşlıq edib, birgə tamaşalar hazırlayıblar. “Çin işgəncəsi” hekayəsi, “Təkrarlanma” roman-epopeyası və şeirlər kitabı 80-ci illərdə çap olunub. Vim Vendersin “Berlin üzərindəki səma” filminin ssenari müəllifidir. Piter Handkenin məşhur romanıolan "Qapıçının penalti qorxusu" Azərbaycan dilinə tərcümə olunub.
Olqa Tokarçuk "Ensiklopedik ehtirasla sərhədləri aşmağı həyat forması kimi təmsil edən təhkiyə təxəyyülünə görə", Piter Hendke isə "Linqvistik bacarıqları ilə insan varlığının periferiyasını və xüsusiyyətlərini araşdıran nüfuzlu əsərlərinə görə" mükafata layiq görülüblər.
Xatırladaq ki, ötən il Nobel Komitəsində yaşanan qalmaqala görə bir neçə jüri üzvü istefa vermiş, nəticədə Ədəbiyyat üzrə Nobel mükafatının təqdimatı təxirə salınmışdı.