Bu gecə “Buker” müsabiqəsinin qalibi məlum olacaq -Siyahıda kimlər var?

Bu gecə “Buker” müsabiqəsinin qalibi məlum olacaq


Bu gecə "Buker"in qalibi bilinəcək.

Altı namizəd, onların əsərlərini bir az da yaxından tanıyaq, təxminlər edək.


1) Xeyli adamın fikrincə, ən böyük favorit Marqaret Etvuddur. Etvudun mükafata təqdim etdiyi "The Testaments" (Təxminən "Əhdlər") romanı müəllifin 15 il qabaq yazdığı məşhur "The Handmaid’s Tale" əsərinin davamıdır. Qeyd edim ki, 15 il qabaq yazılan bu məşhur roman Türkiyədə də, bizdə də "Damazlıq qızın hekayəsi" adıyla çapdan çıxıb və məncə, məzmuna uyğun olsa da, müəllifin seçdiyi addan çox uzaqdır. Mən "qulluqçu, kəniz" mənasında işlədilən "handmaid" sözünün tərcüməsini elə həmin sözün kökündəki "hand"-dən çıxış edərək "əlaltı" kimi yazmağı təklif edirəm, variantım belədir: "Əlaltının əhvalatı." Xatırladım ki, Etvud 2000-ci ildə "Kor qatil" romanıyla "Buker"i qazanıb.


2) Salman Rüşdü haqqında elə bilirəm geniş yazmağa ehtiyac yoxdur. Sənətkar 1981-ci ildə "Gecayarısı uşaqları" romanıyla "Buker", 1993-cü ildə "Booker of Bookers", 2008-ci ildə isə "Best of The Booker" mükafatlarını qazanıb. Bu il mükafata namizəd olan əsəri "Kixot" adlı metaromandır. Belə deyək ki, Rüşdünün variantında, müasir "Don Kixot" haqqında bir kitab.


3) Lusi Elman dünyaca məşhur coysşünas Riçard Elmanın qızıdır. Deyilənə görə, müəllifin Kral ailəsindən də, yüksək rütbəli vəzifələrdə işləyən məmurlar arasından da xeyli dostu var. Elmanın mükafata təqdim etdiyi əsər "Ducks, Newburyport" (Ördəklər, Nyuberiport) adlanır. Roman evdar bir qadın haqqında şüur axını texnikasıyla yazılıb və 1000 səhifədir.


4) Bernard Evaristonun mükafata təqdim etdiyi əsər "Qız, qadın, başqaları" adlanır. Müəllif Kral ailəsinin Ədəbiyyat Dərnəyində idarə heyətinin üzvüdür. Evaristonun mükafata namizəd olan romanı 19-93 yaş aralığında olan 12 zəncinin həyatını bütün şaxələriylə təsvir edir.

5) Çiqozi Obioma namizədlər arasında ən gəncidir, 33 yaşı var, Nigeriyalıdır. Beynəlxalq ədəbi nəşrlərdə ona məşhur "Çinua Açebenin varisi" deyirlər, bundan başqa gənc yaşda "100 beynəlxalq mütəffəkir" siyahısına da düşüb. Obiomanın mükafata təqdim etdiyi əsər "An Orchestra of Minorities'" (Azlıqların orkestri) adlanır. Roman sevdiyi qadına öz sevgisini isbat etmək istəyən Nigeriyalı bir fermerdən bəhs edir. Romanın təhkiyəçisi Afrika mifologiyasında xilaskar ruh sayılan Çidir.

6) Elif Şafak mükafata namizəd olan əsəri "On dəqiqə 38 saniyə" adlanır. Roman İstanbulun yoxsul məhəllərindən birində öldürülüb zibilliyə atılan bir fahişənin şüurunu tam itirməmiş (on dəqiqə 38 saniyə) yadına düşənlərdən bəhs edir.


Qeyd edək ki, siyahıdakı namizədlərdən Salman Rüşdü və Elif Şafakın əsərlərinin Azərbaycanda yayım hüququ "Qanun" Nəşriyyatına aiddir.

Yazar: Qismət Rüstəmov