“Nəşriyyatlar vergidən azad edilsin” – Deputatdan etiraz

“Nəşriyyatlar vergidən azad edilsin”


“2012-ci ilin tədqiqatlarına görə, Türkiyədə televiziya izləmə müddəti son bir ildə 3,5 saatdan 4 saata yüksəlib. Bu dünya birinciliyi deməkdir. Almaniyada bir adam gündə 24 dəqiqə kitab oxuyarkən, Türkiyədə bir adam 16 saniyə kitaba vaxt ayırır. Bir yapon ildə 25, bir isveçli 10 kitab oxuyarkən, bu müddətdə 6 adam cəmi 1 kitab oxuyur”


Bu sözləri millət vəkili Fazil Mustafa deyib.

Onun sözlərinə görə, 5 milyon əhalisi olan Finlandiyada 1202 kitabxana, 80 milyon əhalisi olan Türkiyədə isə 1434 kitabxana var:
“Beynəlxalq standartlara görə, xalq kitabxanalarında 123 milyon kitab olması nəzərdə tutulsa da, Türkiyədə bu rəqəm sadəcə 13 milyondur. Kitabxanalarda qeydiyyatı olan oxucu sayı 254 mindir. İnsan İnkişafı indeksinə görə kitab oxuma baxımından 86-cı sıradadır. Ən maraqlısı da budur ki, insan ehtiyacları sırasında kitab 235-ci yerdə gəlir. Yəni kabab, çörək, maşın, siqaret, rakıdan çox-çox sonra.
Hazırda 2019-cu ilin sonlarıdır. Təbii ki, burada qeyd olunan durumda müsbət dəyişikliklər mövcuddur. O ölkədən söhbət gedir ki, orada həqiqətən bir kitab tərcüməsi və çapı yüksəlişdədir. Azərbaycanda durum daha acınacaqlıdır. Statistikasız da söyləmək mümkündür. Bizdən fərqli olaraq Türkiyə kitab və çap məhsullarına tətbiq edilən 8%-lik ƏDV-ni sıfırladı ki, kitab nəşrini stimullaşdırsın, kitab oxumağa meyli artırsın”.
Fazil Mustafa qeyd edib ki, Gürcüstan da kitaba və çap məhsullarına qoyulan ƏDV-ni tam olaraq götürdü:
“Azərbaycanda isə dəfələrlə müraciət etməmizə baxmayaraq 18% ƏDV qalmaqdadır. Bizim bütün sahələrdə geriliyimiz özümüzlə bağlıdır. Zamanın çağırışlarına yaxalaya bilmədiyimizdəndir”.
Mənbə: teleqraf.com