Ölkəmizdə, hətta ömründə kitab oxumayan adamlar arasında da, Molla Nəsrəddinin bir neçə lətifəsini bilməyən, yeri gələndə, vəziyyətə uyğun şəkildə müdrik Mollanın fikirlərinə istinad etməyən kimsəyə rast gəlmək qeyri-mümkündür. Ancaq bu böyük gülüş ustası tək bizim yumor qəhrəmanımız deyil. O, bir dünya vətəndaşıdır. Adı və ibrətamiz lətifələri dil, din maneələri tanımadan, coğrafi sərhəd bilmədən yüz illər boyu dünyanın üç qitəsində 30-a yaxın xalq arasında yayılıb. Oxuculara təqdim olunan bu kitabda Molla Nəsrəddin, Xoca Nəsrəddin, Nəsrəddin Əfəndi, Nəsir Əfəndi, Anastratin və s. adlarla tanınan baməzə türk müdrikinin 23 dünya xalqına məxsus 1001 lətifəsi toplanıb.