Aytən Cavanşir Bakı şəhərində dünyaya gəlib. Mediada yüzlərlə müəllif yazısı və incəsənət layihələrinin yaradıcısı kimi çıxış etmiş yazıçı Azərbaycan və İtaliyada təhsil alıb. Ədəbiyyata 2012-ci ildə “Vəkil” romanı ilə gəlib. Roman gənc vəkilin bacısının Ukraynadan Bakıya qayıtması və özünün də yüksək vəzifəli məmurun şəxsi vəkili olmasından sonra həyatının köklü şəkildə dəyişməsindən bəhs edir. Baş qəhrəmanın şahidi olduğu haqsızlıqlar özünə qarşı çevrilir və bu yolda rastlaşdığı məhəbbət də amansızcasına hədəfə alınır... 2014-cü ildə yazıçının “Ayaqlarım üşüyürdü” adında hekayələr toplusundan ibarət kitabı çap olundu. Müxtəlif məzmunlu zərif dildə nəql olunan hekayələr əsl məhəbbət və digər aktual problemləri əhatə edir. 2015-də Aytən Cavanşirin “Pərdələri çəkin” kitabı nəşr olundu. Kitabda müəllifin dilindən əsasən retro kino və musiqi fədailəri - onların sənət yolları, taleləri və özlərinin həyat barədə fikirləri qələmə alınıb. 2017-ci ildə yazıçının “klassiklər” seriyasına daxil olan azərbaycan dilinə tərcümə etdiyi düncaya məşhur “Tikanlıqda şərqi deyənlər” əsəri işıq üzü gördü. 2020-ci ildə müəllifin “Qayıtmasam da, gözlə” romanı çap olunub. Romanda dünyanın amansız gedişatının fonunda cərəyan edən sevgi hekayəsi qələmə alınıb. Hadisələr əntiq əşyalar dükanında başlayır və sonradan İtaliya, Fransa, Bolqarıstan və İraqda davam edir. Bu gözəl və sədaqəti, uca insani dəyərləri təbliğ edən romanda oxucu qəhrəmanların qovuşa biləcəyi anı səbrsizliklə gözləyir... 2025-ci ildə isə Aytən Cavanşirin yerli ədəbiyyatda ilk pasifist əsər sayılan “Barışıq” romanı nəşr olundu. Hər zaman üçün aktual olan romanın mövzusu oxucuya şüurunun, hisslərinin dərinliyində gizlətdiyi və heç kimə açmağa ürək etmədiyi həqiqətləri, ən nəhayətdə özünə etiraf etməyə imkan verir. Romanın sonluğu ən soyuqqanlı oxucunu belə həyəcanlandırmağa müvəffəq olur...