Səlim Babullaoğlu (1972) şair, tərcüməçi və essesitdir; çağdaş Azərbaycan şeirinin öncüllərindəndir; “Tənha” (1996), “Polkovnikə heç kim yazmır” (2010, 2013, 2014), “İlyas Göçmənin şəkil dəftəri” (2009, 2016) şeir toplularının, “Ədəbi söhbətlər” (2011), “Ədəbi yuxular” (2015) və başqa publisistika, esse kitablarının müəllifidir; onlarla kitabın tərtibçisi, redaktoru, tərcüməçisi və naşiridir. “İlyas Göçmənin şəkil dəftəri” kitabı 2000-2010-cu illərin ən yaxşı 5 şeir toplusundan biri kimi dəyərləndirilib. “İlin ən yaxşı tərcüməçisi” (Bakı, Gənclər və İdman Nazirliyi, 2002), Məhəmməd Füzuli Beynəlxalq Şeir Yarışmasının juri ödülünə (Ankara, İLESAM, 2004), “Qızıl Kəlmə-Şans” (Bakı, Mədəniyyət Nazirliyi, 2010), Mikayıl Müşfiq (Bakı, 2013), Rəsul Rza (Bakı, 2015) ədəbi mükafatlarına, Şəhriyar Beynəlxalq Mədəniyyət Medalına (Təbriz Universiteti, İran, 2018), İvo Andriç Medalına (Serb Kral Akademiyası, Serbiya, 2019), başqa bir çox milli və beynəlxalq ödüllərə layiq görülüb. Avropa Azadlıq Şairi Beynəlxalq Poeziya Müsabiqəsinin (Polşa, Qdansk, 2018) nominantıdır. Şeirləri dünyanın iyirmidən artıq dilinə çevrilib, nüfuzlu ədəbi nəşrlərdə işıq üzü görüb. Türkiyə, Almaniya, Gürcüstan, Ukrayna, Moldova, Polşa, İran və Serbiyada şeir kitabları nəşr edilib.