Elpis-ll kitab

Yaratmaqla məhv etmək arasında qalmaq, həyatla ölüm arasında qalmaq kimidir. Qaranlığın dərinliklərindən bir şimşək kimi çaxan kiçik işıq parıltısı. Parıltının nə qədər uzaqda olduğu bilinməsə də, o, sürətlə böyüyərək sənə tərəf gəlir. O parıltı, sanki nə isə böyük bir şeyin partlayışı. Amma bu partlayış hər şeyi yox etmək üçün deyil, yaratmaq, var etmək üçün gəlir. Bu güc yaradılışın gücüdür. Belə bir gücün nəyinsə məhvindən yarandığı aydındır. Bəlkə də, bir şeyləri yaratmazdan əvvəl, başqa bir şeyləri məhv etmək məcburiyyətindəsən. Axı gələcəyi qurmaq üçün keçmişi yıxmaq lazımdır. Bəlkə də, o işıq sənin üçün gəlir. Çünki sən də keçmişin bir parçasısan. Bu, qaranlıq tunelin sonunda görülən işıq kimidir. Özü ilə həyat gətirən işıq sənə ölüm gətirəcək. Ölümdən qorxursan? Səncə ölmək qorxuludur, yoxsa yaşamaq? Məncə, ölümdən qorxmamalısan. Sən onun gəldiyini heç hiss etməyəcəksən. Yaşamaq ölümdən daha qorxuludur. Kainata yaşamı bəxş edən həyatın mənbəyi, həyat ilə birlikdə ölümü də gətirəcək. Əzablı bir həyat yaşadığın üçün sən sonda ölümlə mükafatlandırılacaqsan. Ölümdən sonra nə olacağını bilmədiyin üçün ondan qorxursan. Amma nə səbəbə yaşadığını bilməsən belə, yenə də "Yaşamaq gözəldir" deyirsən. Sənin üçün nə fərqi var? Ölümdən sonra nə olacağını düşünməkdənsə, nə üçün yaşadığını düşün. Amma yaratmaq məhv etməkdən daha yaxşıdır, elə deyilmi? Hər yeni yaradılış özündən əvvəlkinin məhv olmağı deməkdir. Xaosdan yaranan nizam və nizamın sonunu gətirən xaos. Xaos olmasa, nizamın dəyəri bilinməz. Xaos olmasa, nizama da ehtiyac olmaz. Nizam yaratmaq üçün ilk növbədə xaos yaratmalısan. Xaosdan nizam yaradıb hər şeyi qaydasına salan, əlbəttə ki, yaxşı birisi olmalıdır.