Əsər atasını və gənc qardaşını itirmiş, anasıyla böyük bir malikanədə yaşayan Alen adlı yeniyetmədən və onun eşqlə etiqad arasında yaşadığı təbəddülatlardan, yaşadığı iztirablardan bəhs edir. Atasından qalan böyük təsərrüfatı anası idarə edir, o isə ruhi təlatümlərin burulğanında çabalayır. Gənc Alenin anası ərindən qalmış təsərrüfatı bacarıqla idarə edir, böyük oğlu Loran vərəm xəstəliyindən həyatını itirdikdən sonra anası bütün ümidlərini ona bağlayır və onu varlı ailədən olan bir qızla evləndirmək niyyətindədir. Alenin bir kitab mağazasında görüb vurulduğu yaşlı qadın ondan anasını atmağı tələb edir. Anası nə qədər tamahkar, mülkiyyət düşkünü olsa da, Alen onu ata bilməz. Bu bitməz iztirabların və qarışıqlığın içində Alen Janetta ilə qarşılaşır. Bu təsadüf Janettanın ölümünə səbəb olsa da, oxucu günahkar axtarışınada Alen tam olaraq günahkar olaraq görmür. Yazçının yaratdığı şübhə labirintində oxucu çaşıb qala bilər. Yazıçının məqsədi də məhz budur. Amma bütün şübhələrin açarı və labirintin çıxışı var. Soyuqqanlı və diqqətli mütaliə bizi həqiqətə doğru aparır...Bəs, diqqətli oxucu Alenin iztirablarına soyuqqanlı yanaşa biləcəkmi?