Mühafizəçi peşəsi müasir cəmiyyətin təhlükəsizlik sistemində, sosial və iqtisadi sabitliyin qorunmasında, ictimai asayişin və vətəndaş hüquqlarının təminində əvəzsiz rol oynayır. Peşəkar mühafizəçi fəaliyyəti cəmiyyətin rifahı, insanların və dövlətin maraqları üçün vacibdir.
Azərbaycanda mühafizəçi peşəsinin inkişafı ölkənin iqtisadi, sosial və hüquqi dəyişiklikləri ilə paralel şəkildə gedir. Bu prosesdə ixtisaslaşmış mühafizə şirkətləri, dövlət və özəl obyektlərdə fəaliyyət göstərən peşəkar mühafizəçi heyətləri formalaşıb, bu sahədə kadr hazırlığı və texniki təminat gücləndirilib. Bununla belə, mühafizəçilərin davamlı olaraq hazırlığı prosesində mühafizənin bütün aspektləri əks olunmuş yığcam bir kitabın olmaması, mühafizəçilərin kefiyyətli və hərtərəfli bilik və bacarıqlara sahib olmasına çətinlik yaradırdı. Düşünürəm ki, bu baxımdan təqdim olunan bu kitab qeyd olunan boşluğu doldurmağa imkan vermiş olacaq.
Peşəkar mühafizəçi olmaq üçün yalnız fiziki güc deyil, həm də zehni çeviklik, mühafizənin hüquqi əsasları, psixoloji dayanıqlıq, çevik qərarvermə qabiliyyəti, müasir rəqəmsal texnologiyaların imkanlarından istifadə etmək bacarıqları, streslərə davamlılıq, yorğunluğun götürülməsi üçün əməli tədbirlər, həkiməqədər ilkin yardım, yanğın təhlükəsizliyi və s. üzrə mühüm bilik və bacarıqlar vacibdir.
İşin mahiyyətindən irəli gələn təhlükəli, fövqəladə və gözlənilməz hallar üçün mühafizəçi daim hazırlıqlı olmalı, təxirəsalınmaz tədbirlər görməli, operativ düşünə və sürətli reaksiya verə bilməlidir. Mühafizəçi xüsusi olaraq psixoloji cəhətdən hazırlıqlı olmalı və bu baxımdan diqqətin dağılmamasına, yaranan vəziyyətlərə fokuslanmağa, istənilən şəraitdə soyuqqanlı qalmağa, təzyiqə və emosional gərginliyə dözümlü olmağa və insanlarla ünsiyyətdə nəzakətə və etik davranışa önəm verməlidir. Bu baxımdan, müha4 fizəçi üçün qeyd olunan vacib bilik və bacarıqlar bu kitabın uyğun bölmələrində əks olunmuşdur.
Kitab, 15 il özəl mühafizə şirkətində məsləhətçi qismində işlədiyim dövrdəki və həmçinin 40 illik SƏTƏMM sahəsindəki bilik və təcrübəyə əsaslanaraq tərtib olunmuşdur.
Ümid edirəm ki, bu kitab sizə işinizdə daha inamlı, daha bacarıqlı, daha səmərəli və ən əsası daha təhlükəsiz iş qurmağa yardımçı olacaq.
Qasım Əliyev
Rəylər
Rəy yaz