Müqəddəs Avqustinlə 90 dəqiqə

Böyük ilahiyyatçı Müqəddəs Avqustin xristian kilsəsinin müqəddəs atasıdır. Onun təlimi bir neçə yüzillik ərzində Qərb xristian kilsəsinin ideologiyasının əsasını təşkil edib. Avqustin IV-V əsrlərdə yaşayıb. Şimali Afrikanın Taqasta şəhərində anadan olub. Onun ən məşhur əsərlərindən biri “Tövbə” adlanır. Bu, avtobioqrafik əsərdə müəllif öz həyatını mistik və mənəvi təcrübə baxımından təsvir edir.

“Tanrı şəhəri haqqında” kitabı isə xristianlığın apologiyasına həsr olunub. Avqustin fəlsəfəsində Tanrı hər bir ideyanın, düşüncənin mərkəzindədir. O, hər şeyin Tanrının iradəsindən asılı olması fikri ilə bir tərəfdən fanatizmə, digər tərəfdən isə gerçəkliyin irrasional yozulması ideyasına gəlib çıxıb. Tanrının mütləq əbədiliyi ilə maddi dünyanın dəyişkənliyi arasındakı fərqi göstərib.

Bu anlayışların bir-birinə qarşı qoyulması xristian dünyagörüşünün əsaslarından birini təşkil edir. Müqəddəs Avqustinin əsərlərində zaman, düşüncə, idrak, iman, ruh, dövlət və digər məsələlər haqqında da maraqlı mülahizələri var.