Bu əsər, zülmə, ədalətsizliyə, özbaşınalıq və avtoritorizmə qarşı mübarizənin ən parlaq nümunəsidir. Əsərin qəhrəmanı Pereyra adicə jurnalistdir, onu mə­dəniyyət səhifəsindən, ədəbiyyatdan, əcnəbi yazı­çıla­rın əsərlərini tərcümə etməkdən başqa heç nə maraq­landırmır. Ancaq iş elə gətirir ki, ortayaşlı, səhhətində problemlər olan bu vicdanlı adam özü də istəmədən siyasi hadisələrin axarına düşür, idealist gənclərə kömək edir. Əsərdə bir epizodda Pereyra ölkənin iki tanınmış ziyalısının Lissabonu tərk etmək barədə danışıqlarını eşidir və onlara yaxınlaşıb deyir: «Siz xalqa lazımsınız». Bununla Pereyra onların ölkəni tərk etməsinə qarşı çıxır, ancaq bu hadisədən qısa bir müddət sonra o özü ölkəni tərk etməli olur. O, seçim qarşısında qalır: ya gözünün qabağında öldürülmüş gənc fəalın qətlinə göz yumaraq, susaraq ölkəsində qalmalıdır, ya da xarici ölkəyə sığınaraq Salazar diktaturasının amansızlığı barədə dünyaya xəbər verməli və vətənindən didərgin düşməlidir. Pereyra ikincini seçir. O, həqiqəti deməyi vətəndə yaşamaqdan üstün tutur. Müəllif bu əsərində oxuculara həqiqətin, prinsipiallığın hər şeydən üstünlüyünü, zülmə, ədalətsizliyə qarşı hamının nəsə bir şey etməli olduğunu aşılayır.

---

Antonio Tabukki — italyan yazıçı, "Pereyra iddia edir" adlı əsərin müəllifidir. Antonio Tabukki 23 sentyabr 1943-cü ildə Pizada dünyaya gəlib, lakin Veççiano qəsəbəsində nənəsi və babasının yanında böyüyüb. 1969-cu ildə universiteti bitirib. Buraxılış işinin mövzusu "Portuqaliyada yalançılıq" olub. 1970-ci illərdə Pizadakı "Scuola Normala Superiore"də Portuqal dili və ədəbiyyatını tədqiq edib. 1973-cü ildə Boloniya Universitetinin Portuqal dili və ədəbiyyatı kafedrasında müəllim işləməyə başlayıb. Onda portuqal dilinə və ədəbiyyatına marağı Fernando Pessoanın yaradıcılığına olan heyranlığı və onu ana dilində oxumaq arzusu doğurub. 1975-ci ildə ilk romanı "Piazza d'ıtalia"da (Milan: Bompiani) dərc olunub. Siena Universitetində, Nyu-Yorkdakı "Bard Kolleci"ndə, Parisdəki "École des Hautes Études" və "Collège de France" kimi tanınmış təhsil müəssisələrində dərs deyib. Əsərləri qırxdan artıq dilə tərcümə olunub. Hazırda da üzvü olduğu Beynəlxalq Yazıçılar Parlamentinin qurucularından biridir. Tabukkiyə 2007-ci ildə Lyej Universitetinin fəxri doktoru adı verilib.