Seçilmiş əsərləri - IX cild

Azərbaycanın Xalq şairi, millət vəkili Sabir Rüstəmxanlının 15 cildlik Seçilmiş Əsərlərinin 9-cu cildində ədəbi mühitdə geniş əks-səda doğuran “Şair və şər” və “Sunami” romanları yer almışdır.Azərbaycanın böyük istiqlal şairi Məhəmməd Hadinin bədii obrazının yaradıldığı “Şair və şər”i müəllif “düşüncələr romanı” adlandırmışdır. Məhəmməd Hadinin faciəli həyatına həsr olunmuş bu romanda XX yüzilin əvvəlində yaşamış bir sıra böyük tarixi şəxsiyyətlərimizin taleyi və bölgədə gedən ziddiyyətli proseslər ustad qələmi ilə işıqlandırılmışdır.Həcmcə o qədər də böyük olmayan və birnəfəsə oxunan “Sunami” romanında isə əsas mövzu planetimizin və insanlığın uzayda tutduğu yer, çağdaş sivilizasiyanın taleyi və Yerlə Göyü birləşdirən Böyük Sevgidir.