Stockholm şəbəkəsi

Rahim Sadıqbəylinin “STOCKHOLM ŞƏBƏKƏSİ” adlı bu əsəri müasir dövr Azərbaycan cəmiyyəti üçün nisbətən yeni, amma çox xarakterik fenomen olan Qərbi Avropa ölkələrinə MÜHACİRƏT haqqında bir romandır. Kriminal roman janrında nəql etdiyi bu əsəri müəllif, əslində, İsveçdə, eləcə də digər Avropa ölkələrində müşahidə etmiş olduğu həyat hekayələri üzərində qurmuşdur.

Əsər, əsasən, müəllifin yaradıcı təxəyyülünün məhsulu olsa da, sanki reallığı əks etdirir. Əsərin süjeti İsveçin hüquq-mühafizə orqanlarının Azərbaycandakı həmkarları ilə bərabər beynəlxalq narkotik maddə şəbəkəsini çökdürməsindən ibarət olduğu halda, yazar bu əsərdə fərqli məzhəblərə, dinlərə və millətlərə tolerantlığı ilə məşhur, dünyanın ən demokratik və inkişaf etmiş ölkələrindən olan İsveç Krallığında məskunlaşmış azərbaycanlıların portretini yaratmaqla və onların bu ölkədə sürdüyü yaşam tərzini təsvir etməklə, əslində, bu ölkənin timsalında yurddaşlarımızın hər hansı bir xarici ölkədə uyğunlaşma qabiliyyətindən, dünya vətəndaşı ola bilmək hazırlığından, inteqrasiya qabiliyyətindən, Azərbaycanın imajına necə təsir edə biləcəklərindən bəhs etmək istəmişdir.