“Yaşıl bağın ölüləri” haqqında


“Yaşıl bağın ölüləri” yaxşı bir romandır. Müasir İran ədəbiyyatında belə bir romanın yazıldığına heyrətləndim. Məndə elə bir fikir yarandı ki, müəllif Məhəmmədrza Bayrami bu romanı köz üstündə ayaqyalın gəzərək yazıb. Amma məharətlə səsini içində boğmağı bacarıb...

Pişəvəri hökuməti dağıdılır. Bacaranlar rusların dəstəyi ilə Şimali Azərbaycana qaçıb xilas olurlar. Qalanlar isə İranın Mərkəzi hökumət qüvvələri tərəfindən məhv edilirlər. Azərbaycan Demokratik Firqəsinin minlərlə üzvü, qohumları, yaxınları güllələnir, cəsədləri küçələrdə asılı qalır. Hətta heç bir siyasi məqsədi olmayanlar belə cəzasız ötüşmürlər. Əsərin qəhrəmanı Azərbaycan radiosunda işləyən Balaşdır. Yeni yaranan firqə haqqında onun heç bir məlumatı yoxdur. Sadəcə səsinə görə radioda aparıcılığa cəlb olunur. Xəbər oxuyur və özü də bilmədən dramatik siyasi və tarixi proseslərin müşahidəçisinə çevrilir. Sən demə, müşahidəçi olmağın özü də böyük bir cinayət imiş.

Biz cənub haqqında həmişə yanğılı mətnlər oxumuşuq. O da bizim real təhlilçi olmamıza mane olub. Bu roman o dövrdə baş verən hadisələrə fərqli bir münasibət sərgiləyir.
Yeri gəlmişkən, Mərdəkan sözünün mənası “ölü bağ” deməkmiş. Bu kitabdan öyrəndim. 

Mütləq oxuyun. Mütləq...--






Şərh Yoxdur