Əlisa Nicat “Kitab Söhbəti”ndə oxucularla görüşdü

27 January 2026 17

18 Yanvar 2026 tarixində Qanun Nəşriyyatının təşkilatçılığı ilə keçirilən “Kitab Söhbəti” layihəsi çərçivəsində yazıçı, tərcüməçi və tarixçi Əlisa Nicat oxucularla görüşüb. Ədəbiyyatsevərlərin böyük marağı ilə baş tutan tədbir səmimi və canlı müzakirə mühiti ilə yadda qalıb.

Görüşün aparıcısı yazıçı İlqar Rəsul olub. Tədbirdə həmçinin Qanun Nəşriyyatının rəhbəri Naşir Şahbaz Xuduoğlu da iştirak edib. Açıq dialoq formatında keçirilən görüş zamanı Əlisa Nicat oxucularla bir araya gələrək yaradıcılıq yolu, elmi və ədəbi axtarışları, tarixi mövzulara yanaşması barədə ətraflı danışıb.

Müəllif xüsusilə “Müdriklik Məbədi”, “Sasanilərin Sonu” və digər əsərləri üzərində dayanaraq bu kitabların əsas ideyaları, mövzu seçimi və yazılma prosesi ilə bağlı maraqlı məqamları bölüşüb. Tarix və fəlsəfənin vəhdətində qələmə alınan əsərlərin oxucuda düşüncə yaratmaq məqsədi daşıdığını vurğulayan Əlisa Nicat, yaradıcılığında insanın mənəvi dünyası və tarixi yaddaş anlayışlarının xüsusi yer tutduğunu qeyd edib.

Tədbir zamanı oxucuların ünvanladığı suallar geniş və səmimi şəkildə cavablandırılıb, müxtəlif mövzular ətrafında fikir mübadiləsi aparılıb. Canlı müzakirələr görüşün əsas diqqətçəkən məqamlarından biri olub.

Görüşün sonunda Əlisa Nicat oxucular üçün kitablarını imzalayıb, onlarla yaxından ünsiyyət quraraq xatirə fotoları çəkdirib. Səmimi atmosferdə baş tutan bu görüş “Kitab Söhbəti” layihəsinin oxucu ilə müəllif arasında körpü rolunu bir daha nümayiş etdirib.