Qanun Nəşriyyatında Müşfiq Zeynalovla ədəbi görüş keçirilib

22 May 2026 9

17 may tarixində Qanun Nəşriyyatının binasında şair Müşfiq Zeynalovun “Ruhumun ovuntuları” kitabına həsr olunmuş ədəbi görüş keçirilib.

Tədbirdə müəllif kitabın ideyası, yaradıcılıq prosesi və poeziyaya baxışı haqqında oxucularla fikirlərini bölüşüb. Səmimi atmosferdə baş tutan görüş zamanı kitabda yer alan şeirlərin fəlsəfi və mənəvi çalarları ətrafında geniş müzakirələr aparılıb.

“Ruhumun ovuntuları” kitabında müəllifin müxtəlif mövzularda qələmə aldığı şeirlər toplanıb. Əsərdə Tanrının əbədiliyi, dünyanın faniliyi, mənəvi saflıq və dürüstlük kimi mövzular xüsusi yer tutur. Klassik ədəbiyyatdan bəhrələnən və irfani düşüncələrlə zəngin olan şeirlər oxucularda dərin və mistik duyğular oyadıb.

Bununla yanaşı, kitabda sevgi, ayrılıq, vətən və torpaq mövzularına həsr olunmuş poetik nümunələr də tədbir iştirakçıları tərəfindən maraqla qarşılanıb.

Görüşün sonunda müəllif oxucuların suallarını cavablandırıb, kitablarını imzalayıb və iştirakçılarla xatirə şəkilləri çəkdirib.